habaru page ad two

ދިވެހިރާއްޖެއިން ޖަޕާނަށް ކަނޑައަޅާ ސަފީރުކަމުގެ މަގާމަށް، ކުރީގެ ޔޫތު މިނިސްޓަރު އަޙުމަދު މަޚްލޫފް މިއަދު ރަސްމީކޮށް އައްޔަންކުރައްވައިފިއެވެ. ރައީސް އޮފީހުން ބުނި ގޮތުގައި، މި މަގާމަށް އޭނާ އައްޔަންކުރެއްވީ މިއަދު ހެނދުނު ބޭއްވި ރަސްމިއްޔާތެއްގައި ހުވާކުރެއްވުމަށް ފަހުއެވެ. މަޚްލޫފް މި މަގާމަށް އައްޔަންކުރުމާ ގުޅިގެން، ޚާއްސަކޮށް އޭނާ ވަރަށް ފަހުން ޕާޓީ ބަދަލުކުރައްވައި ޕީއެންސީއާ ގުޅިވަޑައިގަތުމާ ގުޅިގެން ގިނަ ފާޑުކިޔުންތައް ވަނީ އަމާޒުވެފައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، މަޚްލޫފްގެ ނަން ޖަޕާން ސަފީރުކަމަށް ރައްޔިތުންގެ މަޖިލީހަށް ފޮނުއްވީ މިދިޔަ މަހުގެ 26 ވަނަ ދުވަހުއެވެ. އެ ދުވަހު ރިޔާސަތުން ވަނީ މި ނަމާ ގުޅޭގޮތުން ދިރާސާކުރުމަށް ޚާރިޖީ ގުޅުންތަކާބެހޭ ކޮމިޓީއަށް ފޮނުވާފައެވެ. ކޮމިޓީން އޭނާއާ އިންޓަވިއުކުރުމަށް ފަހު، އެ މަގާމަށް އައްޔަންކުރުމަށް ފެންނަ ކަމަށް ނިންމިއެވެ. ޕީއެންސީއަށް ސުޕަމެޖޯރިޓީ އޮތް ރައްޔިތުންގެ މަޖިލީހުން އިއްޔެ ވަނީ މަޚްލޫފަށް އެ މަގާމަށް ރުހުންދީފައެވެ. ފާހަގަކޮށްލެވޭ ގޮތުގައި، މަޖިލީހުން ރުހުން ދިންތާ 24 ގަޑިއިރެއްހާ ކުޑަ ވަގުތެއްގެ ތެރޭގައި ރައީސް ވަނީ އޭނާ އެ މަގާމަށް އައްޔަންކުރައްވާފައެވެ.

މަޚްލޫފަކީ މިދިޔަ މަހުގެ 14 ވަނަ ދުވަހު ޕީއެންސީން ބޭއްވި ބޮޑު ޖަލްސާއެއްގެ ތެރެއިން އެ ޕާޓީއާ ގުޅިވަޑައިގެންނެވި ބޭފުޅެކެވެ. ވަރަށް ފަހުން އޭނާ ވަނީ ކުރިން ނިސްބަތްވެވަޑައިގަންނަވާ އެމްޑީޕީން ވަކިވެވަޑައިގެންފައެވެ. ސަފީރުކަމަށް އައްޔަންކުރަން އޭނާގެ ނަން ފޮނުއްވި ހިސާބުން ފެށިގެން، ޕާޓީ ބަދަލުކުރުމުގެ ސަބަބުން ގިނަ ބައެއްގެ، ޚާއްސަކޮށް ސިޔާސީ ބޭފުޅުންގެ، ފާޑުކިޔުން ވަނީ އަމާޒުވެފައެވެ.

މަޚްލޫފްގެ ސިޔާސީ ހަޔާތަށް ބަލާއިރު، ރާއްޖެއަށް ޕާޓީ ނިޒާމު ތައާރަފްވެގެން އައި ދުވަސްވަރު އުފެއްދި އަދި އޭރުގެ އެންމެ ބޮޑު އެއް ޕާޓީ ކަމަށްވާ ޑީއާރްޕީން އޭނާ ސިޔާސީ ހަޔާތް ފެއްޓެވިއެވެ. އެ ޕާޓީގެ ތެރޭގައި އުފެދުނު ޚިޔާލު ތަފާތުވުންތަކަށް ފަހު، ޕީޕީއެމް އުފެއްދުމުގެ މަސައްކަތުގައި މަޚްލޫފް ވަނީ އިސް ދައުރެއް އަދާކުރައްވައިފައެވެ. ނަމަވެސް، ޕީޕީއެމްގެ ވެރިކަމުގައި އޭނާ ވަނީ ކުރީގެ ރައީސް ޢަބްދުﷲ ޔާމީނާ ދެކޮޅަށް ނުކުމެވަޑައިގެންނެވިއެވެ. އޭރު އޮތް އިދިކޮޅު އިއްތިހާދުގެ ހަރަކާތްތަކުގައި އިސް ދައުރެއް އަދާކުރެއްވިއިރު، އެ ވެރިކަމުގައި މަޚްލޫފް ޖަލަށް ވެސް ލެވުނެވެ. އެއަށް ފަހު، އޭނާ އެމްޑީޕީއަށް ސޮއިކުރެއްވިއެވެ. އަދި، އެމްޑީޕީގެ ވެރިކަމުގައި މަޚްލޫފަށް ވަނީ ޔޫތު މިނިސްޓަރުކަން ދީފައެވެ. ނަމަވެސް، އެ ޕާޓީއަށް ވެރިކަން ގެއްލުނު ފަހުން މަޚްލޫފް ސިޔާސީ ހަރަކާތްތަކުން ގެއްލިފައި ހުއްޓާ، މިހާރު ވަނީ އަލުން ސިޔާސީ މަސްރަހަށް ނުކުމެވަޑައިގެން ޕީއެންސީއާއި ގުޅިވަޑައިގެންފައެވެ.

ޖަޕާން ސަފީރުކަމަށް މަހުލޫފް މިއަދު އައްޔަންކުރައްވައިފި

ގަލޮޅު ދެކުނު ދާއިރާގެ މެންބަރު މީކާއިލް އަޙްމަދު ނަސީމް ރޭ ވިދާޅުވެފައިވަނީ، ކޮމިޝަނަރ އޮފް ޕޮލިސް (ސީޕީ) އިސްމާޢިލް ނަވީން މަގާމުން ވަކިކޮށް ސަރުކާރުން މަސައްކަތްކުރަނީ ސިޔާސީ ނުފޫޒު ނުފޯރުވޭ ފުލުހުން ކޮންޓްރޯލް ކުރުމަށް ކަމަށެވެ. މީކާއިލް މިކަން ހާމަކުރެއްވީ ރާއްޖެޓީވީގެ ޕްރޮގުރާމެއްގައި ވާހަކަ ދައްކަވަމުންނެވެ.

އެމްޑީޕީގެ ޕާލިމެންޓްރީ ގުރޫޕްގެ މެންބަރު މީކާއިލް ވިދާޅުވި ގޮތުގައި، ދާދިފަހުން 241 ކޮމިޓީގައި ހިނގާދިޔަ ކަންކަމުން ފާހަގަވަނީ ވަކި ބޭފުޅަކު ކޮމިޝަނަރ އޮފް ޕޮލިސް ކަމަށް ގެނައުމަށްޓަކައި ކުރަންޖެހޭ ހުރިހާ ކަމެއް މިހާރު ކުރިއަށްދާ ކަމެވެ. އޭނާ ފާހަގަކުރެއްވި ގޮތުގައި، މިހާރުގެ ކޮމިޝަނަރ އޮފް ޕޮލިސް އިސްމާޢިލް ނަވީންއަކީ ސަރުކާރަށް ނުފޫޒު ނުފޯރުވޭނެ ބޭފުޅެއް ކަމުން، ނަވީން މަގާމުން ދުރުކުރުން ސަރުކާރަށް ކޮންމެހެންވެސް މުހިންމުވެފައިވާ ކަމަށް ފެނެއެވެ.

"މިއީ ކޮންމެހެން އިންސާފުވެރި އެއްކަލަ ތަހުގީގެއް ކޮށްގެން ދާންޖެހޭތީވެ ފޮނުވާލަނީކީއެއް ނޫން. އެބޭފުޅުންނަށް (ސަރުކާރަށް) ކޮންޓްރޯލް ނުކުރެވޭތީވެ، އެބޭފުޅުންގެ މީހަކު ކޮމިޝަނަރ އޮފް ޕޮލިސް ކަމަށް ގެންނަން ހިންގާ ވަރަށް ބޮޑު ރޭވުމެއް،" މީކާއިލް ވިދާޅުވިއެވެ.

މީގެ އިތުރުން މީކާއިލް ވިދާޅުވީ، މިފަދަ ކަންތައްތަކެއް ފަނޑިޔާރުންނަށް ވެސް ދިމާވަމުންދާ ކަމަށް ފެންނަ ކަމަށެވެ. ޕޮލްކޯ ކޮރަޕްޝަން ރިޕޯޓާއި ސިފްކޯ ރިޕޯޓާ ގުޅޭގޮތުން ވާހަކަ ދައްކަވަމުން، މި ސަރުކާރަށް ދެއަހަރު ވެގެންގޮސްފައިވާއިރު، މިކަންކަން މިހާރު މި ހުށައަޅައިގެން އުޅެނީ ކީއްވެތޯ މީކާއިލް ސުވާލުކުރެއްވިއެވެ. އެހެންކަމުން، މިއަދު ފެންނަނީ ސިފައިންނާއި ފުލުހުންގެ ތެރެއިން ސިޔާސީ ނުފޫޒު ނުފޯރުވޭ ބޭފުޅުން ކޮންޓްރޯލް ކުރަން ސަރުކާރުން މަސައްކަތް ކުރާތަންކަމަށް އޭނާ ވިދާޅުވިއެވެ. އަދި މިކަން ސިފަކުރެވެނީ ބްލެކްމެއިލް ކުރުމުގެ ބޭނުމުގައި ހިންގާ ހަރަކާތެއްގެ ގޮތަށް ކަމަށްވެސް މީކާއިލް ވަނީ ފާހަގަކުރައްވާފައެވެ.

ސީޕީ ވަކިކޮށް ސަރުކާރުން އުޅެނީ ސިޔާސީ ނުފޫޒު ނުފޯރުވޭ ފުލުހުން ކޮންޓްރޯލްކުރަން: މީކާއީލް

އެމްޑީޕީގެ ކުރީގެ ޗެއާޕާސަން އަދި އިޤްތިޞާދީ ތަރައްޤީއަށް ކުރީގެ މިނިސްޓަރ، ފައްޔާޒް އިސްމާއިލް ވިދާޅުވެފައިވަނީ، ބުނާ ބަހަކުން ނުވަތަ ފާޅުކުރާ ހިޔާލަކުން އެއްވެސް މީހެއްގެ ވަޒީފާއަށް ބަދަލެއް ގެނެވިގެން ނުވާނެ ކަމަށެވެ.

ފައްޔާޒް މިހެން ވިދާޅުވީ، ހުވަދުއަތޮޅު އުތުރުބުރީ ގެމަނަފުށީ ސްކޫލުގައި އެރަށު ދޮންބަގީޗާގޭ، އަމާނުﷲ އަދާކުރަމުން ދިޔަ ވަޒީފާ އެއަތޮޅު ދެކުނުބުރީ ވާދޫ ޖަމާލުއްދީން ސްކޫލަށް އެޑިއުކޭޝަން މިނިސްޓްރީން ބަދަލު ކުރުމާ ގުޅިގެންނެވެ. އޭނާ މިކަމާ ގުޅިގެން އެކްސް (ކުރިން ޓްވިޓަރ) ގައި ހިއްސާކުރި ޕޯސްޓެއްގައެވެ.

އަމާނުﷲގެ ވަޒީފާ ބަދަލުކުރުމަކީ ސަރުކާރުން އޭނާއަށް ދިން ބޮޑު އަނިޔާއެއް ކަމަށް ފައްޔާޒް ވިދާޅުވިއެވެ. "އެޑިއުކޭޝަން މިނިސްޓްރީން ބޭއިންސާފުން އަޅާ މިފަދަ ފިޔަވަޅުތަކަކީ ވަޒީފާގެ ރައްކާތެރިކަމެއް މިއަދު އެއްވެސް މުވައްޒަފަކަށް ނެތްކަން ސާފުވާ ކަމެއް. ބުނާ ބަހަކުން ނުވަތަ ފާޅުކުރާ ހިޔާލަކުން އެއްވެސް މީހެއްގެ ވަޒީފާއަށް ބަދަލެއް ގެނެވިގެން ނުވާނެ." ފައްޔާޒް އޭނާގެ ޕޯސްޓުގައި ލިޔުއްވާފައިވެއެވެ.

އޭނާ އިތުރަށް ވިދާޅުވީ، މިނިސްޓްރީތައް މެދުވެރިކޮށް ސިޔާސީ ގޮތުން ނުފޫޒާއި ބިރު ދެއްކުމުގެ ސިޔާސަތު އަލުން އިއާދަކުރުމަކީ ބަލައިގަނެވޭނެ ކަމެއް ނޫން ކަމަށެވެ.

ބުނާ ބަހަކުން ނުވަތަ ފާޅުކުރާ ހިޔާލަކުން ވަޒީފާއަށް ބަދަލު ގެނެވިގެން ނުވާނެ: ފައްޔާޒް

ސްރީލަންކާ އަށް އަރާ ފެންބޮޑުވުންތަކާއި ތޫފާން "ޑިޓްވާ" އާ ގުޅިގެން އެ ގައުމަށް ލިބުނު ބޮޑެތި ގެއްލުންތަކުން އަރައިގަތުމަށް އެހީވުމުގެ ގޮތުން ދިވެހި ސަރުކާރުން ދިނުމަށް ނިންމެވި 50،000 (ފަންސާސް ހާސް) ޑޮލަރު، ސްރީލަންކާ ސަރުކާރާއި ރަސްމީކޮށް ހަވާލުކޮށްފިއެވެ.

މިއެހީ ލަންކާ ސަރުކާރާއި ހަވާލުކޮށްދެއްވީ، ރާއްޖެއިން ސްރީލަންކާއަށް ކަނޑައަޅުއްވާފައި ހުންނަވާ ސަފީރު، މަސްއިދު އިމާދެވެ. ލަންކާ ސަރުކާރުގެ ފަރާތުން މިއެހީއާ ހަވާލުވެވަޑައިގަތީ އެގައުމުގެ ހާރިޖީ ވަޒީރު ވިޖިތާ ހެރަތުއެވެ. މިރަސްމިއްޔާތު އޮތީ ކޮލޮމްބޯގައި ހުންނަ ސްރީލަންކާގެ ހާރިޖީ ވުޒާރާގައެވެ.

ދިވެހި ސަރުކާރުން މި އެހީ ދިނުމަށް ނިންމެވީ މިދިޔަ ހޮނިހިރު ދުވަހުއެވެ. އެއިރު ހާރިޖީ ވުޒާރާއިން ވިދާޅުވީ، ލަންކާގެ އެކި ހިސާބުތަކަށް ބޯކޮށް ވާރޭ ވެހި، އެގައުމުގެ ރައްޔިތުންނަށް ލިބިފައިވާ ގެއްލުންތަކާއި ދަތިތަކުން އަރައިގަތުމަށް އެހީތެރިވުމުގެ ގޮތުންނެވެ. 50،000 ޑޮލަރާއެކު، 25،000 މަސް ދަޅު ކޭސް ވެސް ހަދިޔާކުރަން ވަނީ ނިންމާފައެވެ.

މި އެހީގެ ސަބަބުން ހާލުގައި ޖެހިފައިވާ ލަންކާގެ ރައްޔިތުންނަށްއެހީތެރިކަން ލިބި، ލަންކާ ސަރުކާރުން ކުރަމުންދާ މަސައްކަތަށް ކޮންމެވެސް ވަރެއްގެ ލުޔެއް ލިބޭނެ ކަމަށް ދިވެހި ހާރިޖީ ވުޒާރާއިން އުންމީދު ކުރައްވައެވެ. ލަންކާއަށް ކުރި ވިއްސާރައިގައި އެ ގައުމުން 450 އަށް ވުރެ ގިނަ މީހުން ވަނީ މަރުވެފައެވެ. މި ހާލަތުގައި ލަންކާ ސަރުކާރުން ވަނީ ބައިނަލްއަގުވާމީ އެހީއަށް އެދިފައެވެ.

ރާއްޖެއިން ފޯރުކޮށްދިން އެހީއަށް ޝުކުރު އަދާކުރައްވަމުން ލަންކާގެ ހާރިޖީ ވަޒީރު ވިޖިތާ ހެރަތު މީސް މީޑިއާގައި ހިއްސާކުރެއްވި ޕޯސްޓެއްގައި ވިދާޅުވީ، މި ހިތާމަވެރި ހާލަތުގައި ލަންކާ ރައްޔިތުންނާއެކު ދިވެހި ރައްޔިތުން ތިބިކަން ހާމަކޮށްދިނުމަކީ ދެ ގައުމުގެ މެދުގައި އޮތް ވަރުގަދަ ގުޅުން ދައްކުވައިދޭ ކަމެއް ކަމަށެވެ.

މި ފައިސާގެ އެހީގެ އިތުރުން، ލަންކާއަށް އެހީވުމަށް ޕީއެސްއެމުން އިސް ނަގައިގެން ރާއްޖޭގެ ގިނަ މީޑިއާތަކަކާ ގުޅިގެން ކުރިއަށް ގެންދިޔަ "ސިލޯނާއެކު ދިވެހީން" ޓެލެތޯނަށް 800،352 ޑޮލަރު ނުވަތަ 245 މިލިއަން ލަންކާ ރުޕީސް ލިބުނެވެ. އެ ފައިސާ ވެސް މިއަދު ދިވެހި ހާރިޖީ ވުޒާރާއާ ވަނީ ހަވާލުކޮށްފައެވެ.

ދިވެހި ސަރުކާރުން ހަދިޔާ ކުރި 50،000 ޑޮލަރު ލަންކާ ސަރުކާރާއި ހަވާލުކޮށްފި

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، އިނގިރޭސިވިލާތަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު، މިއަދު މާލެ ވަޑައިގެންފިއެވެ. ރައީސް އޮފީހުން މަޢުލޫމާތު ދެއްވާ ގޮތުގައި، އެމަނިކުފާނުގެ މި ދަތުރުފުޅަކީ، އިނގިރޭސިވިލާތުގެ ރަސްގެފާނު، ހިޒް މެޖަސްޓީ ޗާލްސް ތިންވަނައިގެ އިސްނެންގެވުމުގެ ދަށުން އިންތިޒާމްކުރެވުނު "ހައި-ލެވެލް ބްރީފިންގ އޮން ޕްރައިވެޓް ކެޕިޓަލް މޮބިލައިޒޭޝަން" ގައި ބައިވެރިވެވަޑައިގެންނެވުމަށް ކުރެއްވި ދަތުރުފުޅެކެވެ.

މި ބައްދަލުވުމުގައި، ބައިނަލްއަޤްވާމީ ޑިވެލޮޕްމަންޓް ބޭންކްތަކާއި (އެމް.ޑީ.ބީ.) ޕްރައިވެޓް ފައިނޭންސް ފޯރުކޮށްދޭ އިންސްޓިޓިއުޝަންތަކުގެ އިސްވެރީން ބައިވެރިވެވަޑައިގެންފައިވެއެވެ. މި ބައްދަލުވުމުގެ މައިގަނޑު މަޤްޞަދަކީ، ދެމެހެއްޓެނިވި ތަރައްޤީއަށާއި، ދުނިޔޭގެ މޫސުމަށް އަންނަ ބަދަލުތަކަށްޓަކައި މާލީ އެހީތެރިކަން ފޯރުކޮށްދިނުމުގެ މަސައްކަތްތައް ހަލުވިކުރުމާ ބެހޭގޮތުން މަޝްވަރާކުރުމެވެ.

މި ބައްދަލުވުމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވަނީ "ޑެޓް-ފޮރ-ކްލައިމެޓް" އަދި "ޑެޓް-ފޮރ-ނޭޗަރ" މަޝްރޫޢު ކުރިއެރުވުމަށާއި، ތިމާވެއްޓާ ރައްޓެހި ޕްރައިވެޓް ފައިނޭންސް ފޯރުކޮށްދޭ މަރުކަޒުތަކުގެ އެއްބާރުލުން އިތުރުކުރުމާގުޅޭ މަޝްވަރާތަކުގައި ބައިވެރިވެވަޑައިގެންފައެވެ. އެމަނިކުފާނު ވަނީ ދިވެހިރާއްޖެއަށާއި ކުދި ޖަޒީރާ ޤައުމުތަކަށް ކުރިމަތިވެފައިވާ ގޮންޖެހުންތަކާއި މާލީ އެހީތެރިކަމުގެ ބޭނުންތައް ފާހަގަކުރައްވައި، އެކަންކަމަށް ހައްލު ހޯދުމަށް މަގުފަހިކުރެވިދާނެ ގޮތްތަކެއް ހުށަހަޅުއްވާފައެވެ.

މި ދަތުރުފުޅުގެ ސަބަބުން ދިވެހިރާއްޖެއާއި މަތީ ފެންވަރުގެ ބައިވެރިންނާ ދެމެދު އޮތް ގުޅުން އިތުރަށް ބަދަހިކުރުމަށް ވަރަށް މުހިންމު ފުރުސަތެއް ލިބިގެންދިޔައެވެ. އަދި ދުނިޔޭގެ ދެމެހެއްޓެނިވި ތަރައްޤީގެ ލަނޑުދަނޑިތަކާ އެއްގޮތަށް، އިންސާފުވެރި އަދި ދެމެހެއްޓެނިވި މާލީ އެހީއަށް ރާއްޖެއިން ކުރާ ވަކާލާތު އިތުރަށް ވަރުގަދަވެގެން ގޮސްފައިވާކަމަށް ރައީސް އޮފީހުން ވިދާޅުވެއެވެ.

ރައީސުލްޖުމްހޫރިއްޔާ އިނގިރޭސިވިލާތަށް ކުރެއްވި ދަތުރުފުޅު ނިންމަވާލެއްވުމަށްފަހު މާލެ ވަޑައިގެންފި

މޫސުމާއި ބެހޭ ޤައުމީ އިދާރާ (މެޓް އޮފީސް) އިން މިއަދު ނެރުނު ޚަބަރެއްގައި ބުނެފައިވަނީ، ކުރިއަށްއޮތް 24 ގަޑިއިރުވެސް މެދުރާއްޖެތެރެއާއި އުތުރުގެ ރަށްތަކަށް ވިއްސާރަކުރާނެކަމަށެވެ. އެގޮތުން، ބައެއް ވަގުތުތަކުގައި ގުގުރުމާއިއެކު ބޯކޮށް ވާރޭ ވެހޭނެކަމަށް ވަނީ ލަފާކޮށްފައެވެ.

މެޓް އޮފީހުން ވިދާޅުވީ، މެދުރާއްޖެތެރެއާއި އުތުރުގެ އަތޮޅުތަކަށް ވައިޖެހޭނީ ދެކުނާއި ހުޅަނގު ދެކުނުން ގަޑިއަކު 10 މޭލާއި 20 މޭލާއި ދެމެދުގެ ބާރުމިނުގައި ކަމަށެވެ. އަދި މި ސަރަހައްދުތަކުގެ ކަނޑުތައް އާދައިގެ ވަރަކަށް ގަދަވާނެކަމަށް ވެސް މެޓް އޮފީހުން ވިދާޅުވިއެވެ.

ދެކުނުގެ އަތޮޅުތަކަށް މޫސުން ރަނގަޅު ނަމަވެސް، ކޮންމެވެސް ވަރަކަށް ކެރީގެ އަސަރުކުރުން އެކަށީގެންވާ ކަމަށް މޫސުމާބެހޭ ޤައުމީ އިދާރާއިން ލަފާކުރެއެވެ. ދެކުނުގެ އަތޮޅުތަކަށް ވައިޖެހޭނީ ގަޑިއަކު 5 މޭލާއި 15 މޭލާއި ދެމެދުގެ ބާރުމިނުގައި ކަމަށާއި، ކަނޑުތައް އާދައިގެ ވަރަކަށް މަޑުވާނެ ކަމަށް ވެސް މެޓް އޮފީހުން ބުންޏެވެ.

މޫސުމާއި ބެހޭ ޤައުމީ އިދާރާއިން އިތުރަށް ވިދާޅުވީ، މެދުރާއްޖެތެރެއާއި އުތުރުގެ ރަށްތަކަށް މިއަދު ބޯކޮށް ވާރޭވެހޭނެ ކަމަށާއި، މާދަމާ ކެރީގެ އަސަރުކުރާނެ ކަމަށެވެ. އެއަށްފަހު 3 ދުވަހަށް މޫސުން ރަނގަޅުވުމަށްފަހު، އަންނަ އާދިއްތަ ދުވަހު އަނެއްކާވެސް މެދުރާއްޖެތެރެއާއި އުތުރުގެ ރަށްތަކަށް ވިއްސާރަކުރާނެ ކަމަށް ލަފާކުރެއެވެ. މޫސުން ގޯސްވާނެ ކަމަށް ލަފާކުރެވޭތީ، ދަތުރުފަތުރުކުރާ ފަރާތްތަކުން މޫސުމަށް ސަމާލުވުމަށް މެޓް އޮފީހުން އިލްތިމާސްކުރެއެވެ.

މެދުރާއްޖެތެރެއާއި އުތުރުގެ ރަށްތަކަށް މޫސުން ގޯސްވެ، ބޯކޮށް ވާރޭވެހޭނެ -  މެޓް އޮފީސް

ސްރީލަންކާއަށް ކުރިމަތިވެފައިވާ އުނދަގޫ ދަނޑިވަޅުގައި އެ ޤައުމަށް އެހީތެރިވުމަށްޓަކައި ދިވެހި މީޑިއާތައް ގުޅިގެން ކުރިއަށްގެންދިޔަ "ސިލޯނާއެކު ދިވެހީން" ޓެލެތޯނަށް ލިބުނު 800،352 ޑޮލަރު، ޚާރިޖީ ވުޒާރާއާ ރަސްމީކޮށް ހަވާލުކޮށްފިއެވެ. މި ފައިސާ ހަވާލުކުރުން އޮތީ މިއަދުއެވެ.

މި އެހީ ޚާރިޖީ ވުޒާރާއާ ހަވާލުކުރީ ޕީއެސްއެމްގެ ޑެޕިއުޓީ މެނޭޖިންގ ޑިރެކްޓަރ ޢަބްދުﷲ ޔާމީނެވެ. ޚާރިޖީ ވުޒާރާގެ ފަރާތުން ފައިސާއާ ހަވާލުވެވަޑައިގަތީ އެ ވުޒާރާގެ ވަޒީރު ޑރ. ޢަބްދުﷲ ޚަލީލެވެ. ސްރީލަންކާއަށް ދިމާވެފައިވާ ކާރިސީ ޙާލަތުގައި އެ ޤައުމަށް އެހީތެރިވުމަށް ދިވެހި ރައްޔިތުންގެ ފަރާތުން ލިބުނު މި ބޮޑު އެހީއަކީ ދެ ޤައުމުގެ ގުޅުން އިތުރަށް ބަދަހިކޮށްދޭނެ ކަމެކެވެ.

"ސިލޯނާއެކު ދިވެހީން" ޓެލެތޯން ފެށީ ނޮވެންބަރު 30 ވަނަ ދުވަހުގެ ހެނދުނު 9:00 ޖެހިއިރު، 37 މީޑިއާއެއް ގުޅިގެންނެވެ. މި ޓެލެތޯން ނިންމާލީ މިއަދު މެންދުރުފަހު 14:00ގައެވެ. މި ޓެލެތޯނަށް މާލެ، ހުޅުމާލެ އަދި ވިލިމާލޭގެ އެކި ސަރަޙައްދުތަކުގައި ބެހެއްޓުނު ފަންޑު ފޮށިތަކާއި، ބީއެމްއެލްއިން ޚާއްސަކޮށް ހަމަޖައްސައިދިން އެކައުންޓު މެދުވެރިކޮށް އެތައް ބަޔަކު އެހީތެރިކަން ފޯރުކޮށްދިނެވެ. މި މަސައްކަތް ކުރިއަށްދިޔައީ މިނިވަން އޮޑިޓް ފާމެއް ކަމަށްވާ ކްރޯ މޯލްޑިވްސްގެ ބެލުމުގެ ދަށުން ދެފުށް ފެންނަގޮތަށް ރައްޔިތުންގެ އިތުބާރު ދެމެހެއްޓޭނެ ގޮތަށެވެ. ޓެލެތޯނަށް ލިބުނު ފައިސާ ގުނުމުގެ މަސައްކަތް ކުރީވެސް ބީއެމްއެލްއާއި ކްރޯ މޯލްޑިވްސް ގުޅިގެންނެވެ.

މި ޓެލެތޯނަށް ގިނަ އަދަދެއްގެ ޢާންމު ރައްޔިތުންނާއި ސަރުކާރުގެ ވުޒާރާތަކާއި އިދާރާތަކާއި ކުންފުނިތަކާއި ކުލަބު ޖަމިއްޔާތަކާއި އޮފީސްތަކުގެ އިތުރުން މީޑިއާތަކުން ވަނީ ފައިސާގެ އެހީތެރިކަން ފޯރުކޮށްދީފައެވެ. އެގޮތުން، "ސިލޯނާއެކު ދިވެހީން" ޓެލެތޯނަށް އެންމެ ގިނަ އަދަދެއްގެ ފައިސާ ހަދިޔާކުރީ ދިވެހި ފުލުހުންނެވެ. ފުލުހުން ވަނީ 2.4 މިލިޔަން ރުފިޔާ ހަދިޔާކޮށްފައެވެ. ދެވަނައަށް އެންމެ ގިނައިން ފައިސާގެ އެހީއެއް ދިނީ ދިވެހި ސިފައިންގެ ފަރާތުން 1 މިލިޔަން ރުފިޔާ ހަދިޔާކޮށްގެންނެވެ.

ސްރީލަންކާއަކީ ޒަމާނުއްސުރެ ދިވެހިރާއްޖެއާ ނުހަނު ގާތް ރަޙުމަތްތެރި ޤައުމެކެވެ. އަދި އެ ޤައުމުގެ ރައްޔިތުންނަކީ ދިވެހިންނާ ވަރަށް ގާތްގުޅުންތަކެއް ބާއްވާ އެކުވެރި ބައެކެވެ. ރާއްޖޭން ބޭރުގައި އެންމެ ގިނަ ދިވެހިން ދިރިއުޅެމުން އަންނަ އެއް ޤައުމަކީވެސް އަވަށްޓެރި އެކުވެރި ސްރީލަންކާއެވެ. މި ޓެލެތޯނުގެ މަޤްސަދަކީ މިފަދަ ދަނޑިވަޅެއްގައި އެކުވެރި އަވަށްޓެރި ޤައުމަކަށް ދިވެހިންގެ އެކުވެރިކަމާއި އެއްބާރުލުން ދެއްކުމެވެ.

"ސިލޯނާއެކު ދިވެހީން" ޓެލެތޯނަށް ލިބުނު 8 ލައްކައަށް ވުރެ ގިނަ ޑޮލަރު ޚާރިޖީ ވުޒާރާއާ ހަވާލުކޮށްފި

"ތޫފާން ޑިޓުވާ" ގެ ސަބަބުން ސްރީ ލަންކާގެ ގިނަ ސަރަހައްދުތަކެއްގައި ފެން ބޮޑުވެ ބިންގަނޑު ކަނޑައިގެން ދިއުމާއި ކޯރުތައް ބަންޑުންވުމާއި ގުޅިގެން ހާލުގައި ޖެހިފައިވާ ފަރާތްތަކަށް އިންސާނީ އެހީތެރިކަން ފޯރުކޮށްދިނުމަށްޓަކައި، މޯލްޑިވްސް ރެޑް ކްރެސެންޓުން ލަންކާގެ ރައްޔިތުންނަށް އެހީވުމަށް ޚާއްސަ ރިލީފް ފަންޑެއް ހުޅުވައިފިއެވެ.

ރެޑް ކްރެސެންޓުން ވިދާޅުވީ، ލަންކާގައި އިންސާނީ އެހީތެރިކަން ފޯރުކޮށްދެމުންދާ ލަންކާގެ ރެޑް ކްރޮސް ޖަމާއަތަށް އެހީތެރިކަން ފޯރުކޮށްދިނުމަށް "އެމްއާރްސީ ސްރީ ލަންކާ ރިލީފް ފަންޑް" ގެ ނަމުގައި ފަންޑެއް ގާއިމްކޮށް އާންމުންނަށް ހުޅުވާލާފައިވާ ކަމަށެވެ. މި ފަންޑަށް ފައިސާގެ އެހީތެރިކަން ފޯރުކޮށްދިނުމަށް ހުޅުވާލެވިފައިވަނީ މި މަހުގެ އެއްވަނަ ދުވަހުން ފެށިގެން އަށް ވަނަ ދުވަހުގެ ނިޔަލަށެވެ.

ގިނަ އަދަދެއްގެ ދިވެހި ފައިސާ ޑޮލަރަށް މާރުކުރުމުގައި ދިމާވެދާނެ ގޮންޖެހުންތައް ކުޑަކުރުމަށް އަދި ވީ އެންމެ އަވަހަކަށް ފައިސާގެ އެހީތެރިކަން ލަންކާގެ ރެޑް ކްރޮސް ޖަމާއަތަށް ފޯރުކޮށްދިނުމަށްޓަކައި، ފައިސާގެ އެހީތެރިކަން ފޯރުކޮށްދޭން ބޭނުންވާ ފަރާތްތަކުގެ ޑޮލަރު މެދުވެރިކޮށް އެ ފަންޑަށް ފައިސާ ހާދިޔާކުރުމަށް ރެޑް ކްރެސެންޓުން ވަނީ އިލްތިމާސްކޮފައެވެ.

ފައިސާ ހަދިޔާކުރުމަށް ހުޅުވާލެވިފައިވާ އެކައުންޓް ނަންބަރުތައް ތިރީގައި މިވަނީއެވެ.

ރެޑް ކްރެސެންޓުން ވިދާޅުވީ، މި ފަންޑަށް ލިބޭ ހުރިހާ ފައިސާ އެއް ފޯރުކޮށްދޭނީ ކާރިސާއިން އެންމެ ބޮޑު އަސަރުކޮށްފައިވާ ފަރާތްތަކަށް އެހީތެރިކަން ފޯރުކޮށްދިނުމަށްޓަކައި ލަންކާ ރެޑް ކްރޮސް ސޮސައިޓީއަށް ކަމަށެވެ.

މޯލްޑިވްސް ރެޑް ކްރެސެންޓުން ލަންކާއަށް އެހީވުމަށް ރިލީފް ފަންޑެއް ހުޅުވައިފި

ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އަކީ މަތި ބަރު ކުންފުންޏެއް ކަމަށް ވިދާޅުވެ އެ ކުންފުންޏަށް ވަރަށް ބޮޑަށް ފާޑު ކިޔުއްވި، ރައްޔިތުންގެ މަޖިލީހުގެ ހުޅުމާލެ އުތުރު ދާއިރާގެ ޕީއެންސީ މެންބަރު ހުސެއިން ޝަރީފުގެ އަންހެނުންނަށް އެ ކުންފުނިން ބައިލައްކަ ރުފިޔާއަށް ވުރެ ބޮޑު މަހު މުސާރައެއް ލިބޭ މަގާމެއް ދީފައިވާ ކަން ހާމަވެއްޖެ އެވެ.

ލިބިފައިވާ މައުލޫމާތުތަކަށް ބަލާއިރު، މެންބަރު ޝަރީފުގެ އަންހެނުން ޝިނާ ވަޖީހު އައްޔަން ކުރައްވާފައިވަނީ އެޗްޑީސީގެ މެނޭޖިން ޑިރެކްޓަރުގެ ބިއުރޯގެ ޗީފްގެ މަގާމަށެވެ. މީނާ އައްޔަން ކުރެއްވީ ޑިރެކްޓަރެއްގެ ފެންވަރުގައި ކަމަށްވާއިރު، މަހު މުސާރައަކަށް 55،000 ރުފިޔާ ލިބޭ ކަމަށްވެސް މައުލޫމާތު ލިބެ އެވެ.

ދާދި ފަހުން އެ ވަޒީފާއަށް ނިކުންނަން ފެށި ޝިނާ ވަނީ ސްރީ ލަންކާއަށް އެހީވުމަށް ޕީއެސްއެމްއިން ކުރިޔަށް ގެންދިޔަ ޓެލަތޯނުގައި، އެޗްޑީސީގެ ފަރާތުން ފައިސާ ހަދިޔާ ކުރަން އެ ކުންފުނީގެ މެނޭޖިން ޑިރެކްޓަރު އަލީ ޒުހައިރު އާއެކު ވެސް ބައިވެރިވެފަ އެވެ.

ޕީއެންސީގެ ބައެއް އާންމު މެންބަރުން މި ކަމުގައި ދެކޭ ގޮތް ބަލާލި އިރު ގިނަ ބަޔަކު ފާހަގަ ކުރާ ގޮތުގައި، އޭރު މެންބަރު ޝަރީފު އެޗްޑީސީ އަށް އެހާ ބޮޑަށް ފާޑު ކިޔުއްވީ އަންހެނުންގެ ވަޒީފާ ހަމަޖެހިފައި ނުވުމުންނެވެ. ނަމަވެސް ސަރުކާރަށް އެކި ގޮތް ގޮތުން ޕްރެޝަރ ކުރުމަށް ފަހު މެންބަރު ޝަރީފު ވަނީ އަންހެނުންގެ ވަޒީފާ ކަށަވަރުކޮށްފަ އެވެ. އަދި އަންހެނުންނަށް ވަޒީފާ ލިބުމާއެކު، އެޗްޑީސީ އަށް އޭނާ ކުރައްވަމުން ގެންދެވި ފާޑުކިޔުންތައް ވެސް ވަނީ ހުއްޓާލާފަ އެވެ.

އާންމު މެންބަރުން ބުނާ ގޮތުގައި ޕާޓީގެ ގްރާސް ރޫޓްގައި މަސައްކަތް ކުރާ ވަޒީފާ ނެތް މީހަކަށް އެ ކުންފުނިން ވަޒީފާ ލިބުން ނަމަ ރަނގަޅު ކަމަށާއި، ބޮޑު މުސާރަ ލިބޭ މީހުންގެ އަނބިކަނބަލުންނަށް ބޮޑު މުސާރަ ލިބޭ ވަޒީފާ ދޭންޖެހޭ ސަބަބެއް ނޭނގޭ ކަމަށެވެ. އަދި ވިދާޅުވީ ގިނަ ވަޒީފާތައް ބަހާލާއިރު ރައީސް މުއިއްޒުއަށް ގިނަ ފަހަރު މިކަހަލަ ކަންކަން އެނގިވަޑައިނުގަންނަވާ ކަމަށާއި މިއީ ހިތާމަ ހުރި ކަމެއް ކަމަށެވެ. އަދި މިހެން ކަންކަން ކުރުމުން ޕާޓީގެ ގްރާސް ރޫޓްގައި މަސައްކަތް ކުރަން ބޭނުން ނުވާ ކަމަށާއި، މިއީ ރައީސް މުއިއްޒުއަށް ހެޔޮއެދޭ ބަޔަކު ކުރާނެ ކަމެއް ނޫން ކަމަށްވެސް އެ މެންބަރުން ފާހަގަކުރެ އެވެ.

މި ސަރުކާރުގެ ސިޔާސީ މަގާމުތައް އެހެން ހުރިހާ ސަރުކާރަކަށް ވުރެ އިތުރުވެފައި ވާއިރު، ސިޔާސީ ނުފޫޒުން ސަރުކާރުގެ ކުންފުނިތަކަށް އައްޔަން ކުރާ މީހުންގެ އަދަދު ވެސް ވަނީ ވަރަށް ބޮޑަށް އިތުރުވެފަ އެވެ.

އެޗްޑީސީ އަށް ފާޑުކިޔުއްވި މެންބަރު ހުސެއިން ޝަރީފު ގެ އަންހެނުންނަށް، އެކުންފުނިން މެނޭޖިން ޑިރެކްޓަރުގެ ބިއުރޯގެ ޗީފްގެ މަގާމަށް

އިންދިރާ ގާނދީ މެމޯރިއަލް ހޮސްޕިޓަލް (އައިޖީއެމްއެޗް) ގައި ބަރުދަން ލުއިކޮށްދޭ ބެރިއަޓްރިކް ސާޖަރީ ހަދަން ރަސްމީކޮށް ފަށައިފިއެވެ. މިކަމުގެ އުފާވެރި ޚަބަރު އާންމުކުރެއްވީ އައިޖީއެމްއެޗްގެ ސީއީއޯ އިބްރާހިމް އަބްދުލް ރައްޒާގް ހަލީމް އެކްސްގައި ކުރެއްވި ޕޯސްޓެއްގައެވެ.

ހަލީމް ވިދާޅުވީ ބެރިއަޓްރިކް ސާޖަރީ އަކީ ހަޖަމްކުރާ ނިޒާމު މަސައްކަތް ކުރާގޮތަށާއި ގޮހޮރުގެ ސައިޒަށް ބަދަލުގެނެސް، އާދަޔާ ހިލާފަށް ބޮޑަށް ބަރުދަން މަތިވެފައިވާ މީހުންގެ ބަރުދަން ދާއިމީގޮތެއްގައި ދަށްކުރުމަށް އެހީތެރިވުމަށް ކުރާ ވަރަށް ކާމިޔާބު އޮޕެރޭޝަންތަކެއް ކަމަށެވެ. މިއީ ސަރުކާރުގެ ހޮސްޕިޓަލެއްގައި މިފަދަ މުހިންމު ހިދުމަތެއް ދޭން ފެށި ފުރަތަމަ ފަހަރެވެ.

މި އޮޕެރޭޝަންތަކުން ހާސިލުވާ ފައިދާތަކުގެ ތެރޭގައި ބަލިމިހާއަށް ރަނގަޅު ސިއްހަތެއް ލިބިދިނުމާއެކު ނަފްސާނީ ދުޅަހެޔޮކަން ރަނގަޅުވެ، އަމިއްލަ ނަފްސަށް އޮންނަ އިތުބާރު އިތުރުވެ، އަލުން ބަލިމީހާގެ ހަޔާތަށް އުފާވެރިކަމާއި ހިތްހަމަޖެހުން ގެނުވައިދިނުން ހިމެނޭ ކަމަށް ހަލީމް ފާހަގަކުރެއްވިއެވެ. އޭގެ އިތުރުން ކުރިން ބޭސްކުރަމުން އައި ގައިންގަޔަށް ނާރާ ބައެއް ބަލިތަކަށް ބޭސްކުރަން ނުޖެހުންވެސް މި އޮޕެރޭޝަންގެ ސަބަބުން ހާސިލުވާނެ ކަމަށް ވިދާޅުވިއެވެ. އޭގެ ތެރޭގައި ޓައިޕް ޓޫ ހަކުރުބައްޔާއި، ލޭ މައްޗަށް ދިއުމާއި ކޮލެސްޓެރޯލް މަތިވުމާއި، ހިތުގެ ބަލިތަކާއި ބައެއް ބާވަތުގެ ކެންސަރުން ރައްކާތެރައްކާތެރިވުމަށް އެހީތެރިވުން ހިމެނެއެވެ.

އައިޖީއެމްއެޗްގައި ބަރުދަން ލުއިކޮށްދޭ ބެރިއަޓްރިކް ސާޖަރީ ހަދަން ފަށައިފި

މި އަންނަ އަހަރުގެ ލޯކަލް ކައުންސިލްތަކުގެ އިންތިހާބު ވަރަށް ކައިރިވެފައިވާއިރު، ދިވެހިރާއްޖޭގެ އެންމެ ބޮޑު ސިޔާސީ ޕާޓީ ކަމަށްވާ އެމްޑީޕީގެ ލީޑަޝިޕް ތެރޭގައި ވަނީ ހޫނު ބަހުސްތަކެއް އުފެދި، ވާދަވެރިކަން ވަރަށް ބޮޑަށް އިތުރުވެފައެވެ. ޕާޓީގެ އެންމެ ބާރުގަދަ ނިންމުންތައް ނިންމާ މަޖިލިސް ކަމަށްވާ ގައުމީ މަޖިލިސްގައި ހިމެނިވަޑައިގަންނަވާ ގިނަ މެމްބަރުން ތިއްބެވީ ޕާޓީގެ ކުރީ ޗެއާޕާސަން ފައްޔާޒު އިސްމާއިލްގެ ފަހަތުގައި ކަން ވަރަށް ބޮޑަށް ފާހަގަ ވެގެން ގޮސްފައިވެއެވެ.

އެހެންނަމަވެސް، ޕާޓީގެ ކުރީގެ ރައީސް އިބްރާހިމް މުހައްމަދު ސޯލިހު އަދި ޕާޓީގެ ރައީސް އަބްދުﷲ ޝާހިދާއި ރައްޔިތުންގެ މަޖިލިހުގެ ހުޅުމާލެ ދެކުނު ދާއިރާގެ އެމްޑީޕީގެ މެމްބަރު ޑރ. އަހުމަދު ޝަމްހީދު ތާއިދުކުރައްވާ ގައުމީ މަޖިލިސް މެމްބަރުން ވެސް މަދެއްނޫނެވެ. ފައްޔާޒުގެ ޓީމްގައި ކުރީގެ ރައީސް މުހައްމަދު ނަޝީދު ހިމެނިވަޑައިގަތަސް ނަޝީދަށް ތާއިދުކުރާ ގައުމީ މަޖިލިސް މެމްބަރަކު ނެތް ކަމަށް ވާހަކަ ދެކެވުނު ކަމުގައި ވިޔަސް، ހަގީގަތުގައި ގައުމީ މަޖިލީހުގައި ނަޝީދުއަށް ތާއީދު ކުރާ މެމްބަރުން މަދެއްނޫނެވެ. މިއީ ޕާޓީގެ ތެރޭގައި އޮތް ބާރުތަކުގެ މާނަ ކުރުންތަކުގެ ތަފާތު ދައްކުވައިދޭ ކަމެކެވެ.

ފައްޔާޒު އިސްމާއިލް މިދިޔަ މަހުގެ 23 ވަނަ ދުވަހު ޗެއާޕާސަންކަމުން އިސްތިއުފާ ދެއްވުމާ ގުޅިގެން، ވަގުތީ ޗެއާޕާސަނެއް ކަނޑައެޅުމުގެ ކަންކަމުގައި ޕާޓީގެ ލީޑަޝިޕުން ވަނީ އަމަލުކުރާނެ އުސޫލެއް ކަނޑައެޅުމަށް ގިނަ ބައްދަލުވުންތަކެއް ބާއްވައިފައެވެ. މި މަޝްވަރާތައް ކުރިއަށް ދިޔައީ ކުރީގެ ރައީސް ސޯލިހު، ޕާޓީގެ ރައީސް ޝާހިދު، ކުރީގެ ޗެއާޕާސަން ފައްޔާޒު އަދި ލީޑަޝިޕްގައި ހިމެނޭ އެހެނިހެން ބޭފުޅުންގެ މެދުގައެވެ. މަޝްވަރާތަކަށްފަހު، އާ ކޮންގްރެސްއެއް ބާއްވައި ޗެއާޕާސަންކަމަށް މީހަކު އިންތިޚާބު ވަންދެން ތިން މެމްބަރުންގެ ކޮމެޓީއަކުން ޕާޓީ ހިންގަން ހަވާލުކުރުމަށް ގައުމީ މަޖިލިސް ޖަލްސާއެއް މިދިޔަ މަހު 27 ވަނަ ދުވަހުގެ ރޭ 8:30 އަށް ތާވަލު ކުރެވުނެވެ.

އެހެންނަމަވެސް، ކުރީގެ ޗެއާޕާސަން ފައްޔާޒުގެ ޓީމުން ދިޔައީ ތިން މެމްބަރުންގެ ކޮމެޓީއަކުން ޗެއާޕާސަންގެ މަސްއޫލިއްޔަތު އުފުލުމާ ދެކޮޅަށް ވަކާލާތު ކުރަމުންނެވެ. މިކަމާ ގުޅިގެން ގައުމީ މަޖިލިސް ވަޓްސްއަޕް ގުރޫޕްގައި ބަހުގެ ހަމަލާތަކެއް ވަނީ ބަދަލުކުރެވިފައެވެ. ގައުމީ މަޖިލީހުގެ މެމްބަރުންގެ މެދުގައި ހޫނުވެފައިވާ މި މާހައުލު ފިނިކުރުމަށް ލީޑަޝިޕުން އިތުރު މަޝްވަރާއަށް ދިއުމަށް، ތާވަލުކުރެވިފައި އޮތް ގައުމީ މަޖިލިސްގެ ބައްދަލުވުން ކެންސަލް ކުރިކަން އިއުލާން ކުރިއެވެ.

ޖެހިގެން އައި ދުވަހު، ނޮވެމްބަރު 28 ވަނަ ދުވަހު، ކުރެވުނު މަޝްވަރާތަކަށްފަހު އެރޭ 8:30 އަށް ގައުމީ މަޖިލިސް ބާއްވަން ޖަލްސާއެއް ތާވަލުކުރެވުނެވެ. އޭރު ދިޔައީ ގައުމީ މަޖިލިސް މެމްބަރުން ތިއްބަވާ ވަޓްސްއަޕް ގުރޫޕްގައި ކުރީގެ ރައްޔިތުންގެ މަޖިލިސް ރައީސް މުހައްމަދު އަސްލަމަށް ތާއިދު ނުކުރާކަމަށް ފައްޔާޒްގެ ޓީމަށް ނިސްބަތްވާ މެމްބަރުން ވިދާޅުވަމުންނެވެ. އަސްލަމަކީ ގައުމީ މަޖިލިސްއަށް ނިސްބަތްވާ ބޭފުޅަކަށް ނުވާތީ އަސްލަމަށް ވޯޓަށް ނޭހޭނެކަމަށް ބުނެ ފާޑުކިއުންތައް ދިޔައީ ކުރިއަށެވެ.

މި ޖަލްސާގައި، މަޖިލީހުގެ ދިއްދޫ ދާއިރާގެ ކުރީގެ މެމްބަރު އަބްދުﷲ ވަހީދު ވަގުތީ ޗެއާޕާސަންގެ މަގާމަށް ކުރިމަތިލެއްވި ނަމަވެސް އެ މަގާމަށް އޭނާ ހޮވިވަޑައިގެންފައެއް ނުވެއެވެ. ވަހީދު އައްޔަން ކުރަން ފެންނަ ކަމަށް 47 މެމްބަރުން ވޯޓު ދެއްވިއިރު، ނުފެންނަ ކަމަށް 48 މެމްބަރު ވޯޓު ދެއްވިއެވެ. އެ މަގާމަށް ވަހީދު އައްޔަން ކުރަން 48 މެމްބަރުންގެ ވޯޓު ބޭނުންވިއެވެ. އަދި، ޗެއާޕާސަންގެ މަގާމަށް ހިތަދޫ އުތުރު ދާއިރާގެ ކުރީގެ މެމްބަރު މުހައްމަދު އަސްލަމް ވެސް ޝައުގުވެރިކަން ފާޅުކުރެއްވިއެވެ. ނަމަވެސް އަސްލަމަކީ ގައުމީ މަޖިލީހުގެ މެމްބަރަކަށް ނުވާތީ، އެ މަގާމަށް އަސްލަމަށް ވާދަ ކުރެވޭތޯ ބައެއް މެމްބަރުން ސުވާލު އުފެއްދުމުން، ރިޔާސަތުން ނިންމީ އަސްލަމްގެ ނަމަށް ވޯޓަށް ނޭހުމަށެވެ.

މިކަންކަމާ ގުޅިގެން ގައުމީ މަޖިލިހުގެ ބައްދަލުވުމުގައި އެމްޑީޕީގެ ވަގުތީ ޗެއާޕާސަނަކު އިންތިހާބުކޮށްފައެއް ނުވެއެވެ. އަދި ގައުމީ މަޖިލިހުގެ ކޯރަމް ގެއްލި، ހޫނުވުމާ ގުޅިގެން ބައްދަލުވުން ވަނީ ނިންމާލައިފައެވެ. މި ހާދިސާތަކުން ދައްކުވައިދެނީ ކުރީގެ ރައީސް އިބްރާހިމް މުހައްމަދު ސޯލިހާއި ކުރީގެ ރައީސް މުހައްމަދު ނަޝީދާ ދެބޭފުޅުންގެ މެދުގައި އޮތް ވާދަވެރިކަން އެ ޕާޓީގެ ތެރޭގައި އަދިވެސް ހުރިކަމެވެ. ސޯލިހާއި ޕާޓީގެ ރައީސް ޝާހިދު ބޭނުންވަނީ ފައްޔާޒަށް ކޮންޓްރޯލް ނުކުރެވޭ މެމްބަރަކު ވަގުތީ ޗެއާޕާސަނަކަށް އައްޔަންކުރާށެވެ.

އެމްޑީޕީން ބުނީ، ޗެއާޕާސަންގެ މަގާމު ހުސްވުމާ ގުޅިގެން އެ މަގާމަށް ބޭފުޅަކު އިންތިހާބު ކުރެވެންދެން، މަގާމުގެ މަސްއޫލިއްޔަތު ވަގުތީ ގޮތުން ހަވާލު ކުރާނެ ބޭފުޅަކު ކަނޑައެޅުމުގައި އަމަލު ކުރާނެ ގޮތެއް ނިންމަން ގައުމީ މަޖިލިހަށް ދޫކޮށްލަން ހިންގާ ކޮމިޓީން ނިންމާފައިވާ ކަމަށެވެ. އަދި ޗެއާޕާސަނަކު ހޮވުމުގެ ކަންކަން ކުރިއަށް ގެންދަނީ ހުޅުވާލެވިފައިވާ މާހައުލެއްގައި ފުޅާދާއިރާއެއްގައި މަޝްވަރާ ކުރުމަށް ފަހު، ގައުމީ މަޖިލިހުން ނިންމާ ގޮތެއްގެ މަތިން ކަމަށް އެމްޑީޕީން ބުންޏެވެ.

އެމްޑީޕީގެ ބައެއް އާންމު މެންބަރުންގެ ހިޔާލުހޯދާލުމުން ބުނަނީ ބޭނުންވަނީ އާމޫނެއް ކަމަށާއި އެމްޑީޕީ އަކީ އަބަދުވެސް ބަދަލައް ލޯބިކުރާ ބައެއް ކަމަށެވެ. އަދި ފައްޔާޒުގެ ސިޔާސަތުތައް ކަމުދާ ކަމަށް ވެސް އެ މެންބަރުން ބުނެފައިވެއެވެ. މިކަމުން ދައްކުވައިދެނީ ޕާޓީގެ އާންމު މެންބަރުންގެ ތެރޭގައި ވެސް ލީޑަޝިޕްގައި އޮތް މި ހޫނު ވާދަވެރިކަމަށް ތަފާތު ނަޒަރިއްޔާތުތަކެއް ހުރިކަމެވެ.

އެމްޑީޕީގެ ޗެއާޕާސަންކަމުގެ ކޯޅުން: ކުރީ ޗެއާޕާސަން ފައްޔާޒުގެ މެޖޯރިޓީ ގައުމީ މަގިލީހުގައި

ރާއްޖޭގައި އަންހެނުންގެ ފުޓުބޯޅަ ތަރައްގީކޮށް ކުރިއެރުވުމަށްޓަކައި، އެފްއޭއެމް ވިމެންސް ލީގުގައި ވާދަކުރާ ކޮންމެ ޓީމަކަށް އެއްލައްކަ ރުފިޔާގެ ފައިސާގެ އެހީއެއް ދޭގޮތަށް ހަމަޖެހިއްޖެއެވެ. މިއީ ދުނިޔޭގެ ފުޓުބޯޅައިގެ މައި އިދާރާ (ފީފާ) ގެ އެހީތެރިކަމާއެކު ދިވެހި ފުޓުބޯޅަ އެސޯސިއޭޝަން (އެފްއޭއެމް) އިން ރޭ ނެރުނު ނޫސްބަޔާނެއްގައި ހާމަކުރައްވާފައިވާ ކަމެކެވެ.

އެފްއޭއެމް އިން ބުނިގޮތުގައި މިފަދަ އެހީއެއް ކުލަބުތަކަށް ފޯރުކޮށްދިނުމުގެ މައިގަނޑު ބޭނުމަކީ ރާއްޖޭގައި އަންހެނުންގެ ފުޓްބޯޅަ ތަރައްޤީކޮށް، ކުލަބުތަކުން ކުޅުންތެރިން އުފެއްދުމަށް ކުރާ މަސައްކަތަށް އެއްބާރުލުން ދިނުމެވެ. އަދި އޭގެ އިތުރުން އަންހެނުންގެ ލީގު ރަނގަޅު ފެންވަރެއްގައި ކުރިއަށް ގެންދިއުމަށް އެހީތެރިވުމަކީވެސް މިއެހީ ކުލަބުތަކަށް ދިން މައިގަނޑު އެއް ސަބަބެވެ. ރާއްޖޭގައި އަންހެނުންގެ ފުޓްބޯޅަ ތަރައްޤީކުރުމަށް ފީފާއިން ދެމުންދާ އެއްބާރުލުމާއި އެހީތެރިކަމަށްޓަކައި އެފްއޭއެމްއިންވަނީ އެ ފެޑެރޭޝަނަަށް ޝުކުރުއަދާކޮށްފައެވެ.

ގިނަ އަހަރުތަކަކަށްފަހު ފަށާފައިވާ މި އަހަރުގެ ވިމެންސް ލީގުގައި ހަ ޓީމެއް ވާދަކުރެއެވެ. މި ޓީމުތަކުގެ ތެރޭގައި ފުރަތަމަ ޑިވިޝަންގެ ގަދަ ބާރުތަކުންވެސް ވަނީ ބައިވެރިވެފައެވެ.

އަންހެނުންގެ ފުޓްބޯޅަ ކުރިއެރުވުމަށް އެފްއޭއެމްއިން އިތުރު މަސައްކަތްތަކެއްވެސް ކުރަމުން އެބަދެއެވެ. މިގޮތުން، ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ 2025 ވަނަ އަހަރުގެ އާންމު ޖަލްސާ މި އަހަރުގެ ޖޫންމަހުގެ 27 ވަނަ ދުވަހު ބާއްވާފަވާއިރު، އެ އެސޯސިއޭޝަނުގެ އައު ހިންގާ ގަވާއިދު ބައްޓަންކޮށްފައިވަނީ އަންހެނުންގެ ބައިވެރިވުންވެސް ހިމެނޭ ގޮތަށެވެ. އައު ހިންގާ ގަވާއިދަށް މިބަދަލުތައް ގެނައުމުގެ އެއް ބޭނުމަކީ ރާއްޖޭގައި އަންހެނުންގެ ފުޓުބޯޅަ ތަރައްޤީކޮށް ކުރިއެރުވުމެވެ.

ޙަބަރު